ಜಗತ್ತಿನ ಸುಮಾರು 109 ದೇಶಗಳಲ್ಲಿ ಜನಪ್ರಿಯತೆ ಪಡೆದಿರುವ ವಾಟ್ಸ್‌ಆ್ಯಪ್‌ ಬಗ್ಗೆ ಗೊತ್ತಿಲ್ಲದೆ ಇರುವವರು ಯಾರೂ ಇರಲಿಕ್ಕಿಲ್ಲ. ಇದನ್ನು ಬರೋಬ್ಬರಿ 1600 ಕೋಟಿ ಡಾಲರ್‌ ಕೊಟ್ಟು ಫೇಸ್‌ಬುಕ್‌ ಖರೀದಿಸಿತ್ತು.
ಇಷ್ಟೊಂದು ದುಬಾರಿ ಮೊತ್ತಕ್ಕೆ ಬಿಕರಿಯಾದ ವಾಟ್ಸ್‌ಆ್ಯಪ್‌ ಅನ್ನು ಆರಂಭಿಸಿದ್ದು ಜಾನ್‌ ಕೋಮ್‌. ಈತನ ಬಾಲ್ಯ, ಬದುಕು, ಸಾಧನೆ ಎಲ್ಲರಿಗೂ ಸೂಧಿರ್ತಿ ನೀಡುವಂತದ್ದು.
ಈತನ ಕತೆ ಆರಂಭವಾಗುವುದು ದೂರದ ಉಕ್ರೈನ್‌ನಿಂದ. ಅದು 1992ನೇ ಇಸವಿ. ಜಾನ್‌ ಕೋಮ್‌ ಎಂಬ ಬಾಲಕನಿಗೆ 16 ವರ್ಷ ವಯಸ್ಸು. ಅರ್ಥವ್ಯವಸ್ಥೆ ಕೆಟ್ಟದಾಗಿತ್ತು. ಯಾರ ಕೈಯಲ್ಲಿಯೂ ದುಡ್ಡಿರಲಿಲ್ಲ. ದಟ್ಟ ದರಿದ್ರ ಪರಿಸ್ಥಿತಿ. ಇಂತಹ ವಾತಾವರಣದಲ್ಲಿ ಮಗನ ಭವಿಷ್ಯ ರೂಪಿಸಲು ಸಾಧ್ಯವೇ ಇಲ್ಲವೆಂದು ಜಾನ್‌ ಕೋಮ್‌ ತಾಯಿಗೆ ತಿಳಿಯಿತು. ಆ ಕಡು ಬಡತನದಲ್ಲಿ ಆ ಮಹಾತಾಯಿ ಮಗನ ಭವಿಷ್ಯಕ್ಕಾಗಿ ಅಮೆರಿಕಕ್ಕೆ ವಲಸೆ ಹೋಗಲು ನಿರ್ಧರಿಸಿದರು. ತಂದೆ ಉಕ್ರೇನ್‌ನಲ್ಲಿಯ ಉಳಿದರು. ಮಗನ ಭವಿಷ್ಯಕ್ಕಾಗಿ ಅಪ್ಪ-ಅಮ್ಮ ದೂರದೂರ ಇರಬೇಕಾಯಿತು. ಅಮೆರಿಕಕ್ಕೆ ಬಂದಾಗ ಕೈಯಲ್ಲಿ ಹಣವಿಲ್ಲ. ಹೊಟ್ಟೆ ತುಂಬಲು ಸರಕಾರದ ರೇಷನ್‌ ಇತ್ತು. ಬಾಲಕ ಕೋಮ್‌ ದಿನಸಿ ಅಂಗಡಿಯಲ್ಲಿ ಕೆಲಸಕ್ಕೆ ಸೇರಿಕೊಂಡ.
ಪ್ರೋಗ್ರಾಮಿಂಗ್‌ ಪ್ರೀತಿ
18ನೇ ವಯಸ್ಸಿಗೆ ಪ್ರೋಗ್ರಾಮಿಂಗ್‌ ಭಾಷೆ ಕಲಿಯಲು ಜಾನ್‌ ಬಯಸಿದ. ಕಾಲೇಜಿಗೆ ಹೋಗಿ ಕಲಿಯಲು ಅಷ್ಟೊಂದು ದುಡ್ಡೆಲ್ಲಿತ್ತು?. ಸೆಕೆಂಡ್‌ ಹ್ಯಾಂಡ್‌ ಬುಕ್‌ ಪುಸ್ತಕದಂಗಡಿಗಳಿಂದ ಪುಸ್ತಕಗಳನ್ನು ತಂದು ಓದತೊಡಗಿದ. ಓದಿದ ನಂತರ ಆ ಪುಸ್ತಕವನ್ನು ಅದೇ ಅಂಗಡಿಗಳಿಗೆ ವಾಪಸ್‌ ನೀಡುತ್ತಿದ್ದ. ಕಲಿಕೆ ಮತ್ತು ಗಳಿಕೆ ಜೊತೆಯಾಗಿ ಮಾಡುತ್ತಿದ್ದ. ಕೆಲವೇ ಸಮಯದಲ್ಲಿ ಶಾಲೆಗೆ ಹೋಗುವುದನ್ನು ಆತ ಇಷ್ಟಪಡಲಿಲ್ಲ. ಯಾಹೂನಲ್ಲಿ ಕೆಲಸ ಸಿಕ್ಕಿದಾಗ ಅಲ್ಲಿ ಮತ್ತೊಬ್ಬ ಗೆಳೆಯ ಸಿಕ್ಕ. ಅವನ ಹೆಸರು ಬ್ರೈನ್‌ ಆ್ಯಕ್ಟನ್‌.
ಕೋಮ್‌ ತಾಯಿ ಕ್ಯಾನ್ಸರ್‌ನಿಂದ 2000ನೇ ಇಸವಿಯಲ್ಲಿ ಮೃತಪಟ್ಟರು. 1997ರಲ್ಲಿ ಉಕ್ರೇನ್‌ನಲ್ಲಿ ಆತನ ತಂದೆಯೂ ಇಲ್ಲವಾದರು. ಆತ ಒಂಟಿಯಾದ. ಆಗ ಆತನಿಗೆ ಆ್ಯಕ್ಟನ್‌ ಗೆಳೆತನವೇ ಬಂಧುಬಳಗವಾಯಿತು. ಇವರಿಬ್ಬರು ಯಾಹೂ ಕೆಲಸವನ್ನು ಎಂಜಾಯ್‌ ಮಾಡುತ್ತಿರಲಿಲ್ಲ. ಅತ್ಯುತ್ತಮ ಜಾಹೀರಾತು ತರಲು ಯಾಹೂ ಮಾಡಲು ಉದ್ದೇಶಿದಕ್ಕಿಂತ ಭಿನ್ನವಾಗಿ ಕೆಲಸ ಮಾಡತೊಡಗಿದರು. ಇದರಿಂದ ಕೆಲಸವನ್ನೂ ಬಿಡಬೇಕಾಯಿತು.
2007ರಲ್ಲಿ ಕೋಮ್‌ ಮತ್ತು ಆ್ಯಕ್ಟನ್‌ ಯಾಹೂ ಬಿಟ್ಟರು. ಮುಂದೇನೂ ಎನ್ನುವುದು ಅವರಿಗೆ ಸ್ಪಷ್ಟವಾಗಲಿಲ್ಲ. ತಮ್ಮ ಮನಸ್ಸಿನ ಸಮಧಾನಕ್ಕಾಗಿ ಅವರು ಒಂದು ವರ್ಷ ದಕ್ಷಿಣ ಅಮೆರಿಕದ್ಯಾಂತ ಸುತ್ತಿದರು. ಆದರೂ, ಅವರಿಗೆ ಯಾವುದೇ ಐಡಿಯಾ ಸಿಗಲಿಲ್ಲ.
2009ರಲ್ಲಿ ಕೋಮ್‌ ಒಂದು ಐಫೋನ್‌ ಖರೀದಿಸಿದರು. ಆ್ಯಪ್‌ ಸ್ಟೋರ್‌ ಎನ್ನುವುದು ಆಗಮಿಸಿ ಕೆಲವೇ ಸಮಯವಾಗಿತ್ತು. ಐಫೋನ್‌ ನೋಡುತ್ತಿದ್ದಂತೆ, ಕೋಮ್‌ ಮನಸ್ಸಲ್ಲಿ ಹೊಸ ಉದ್ಯಮವೊಂದರ ಕಲ್ಪನೆ ಕಣ್ಣ ಮುಂದೆ ಬಂತು. ಇದೆಲ್ಲ ಆಗೋಲ್ಲ ಬಿಡು ಎಂಬ ಭಾವ ಆತನಲ್ಲಿ ಇರಲಿಲ್ಲ. ಒಂದು ಹೊಸ ಆ್ಯಪ್‌ ಅಭಿವೃದ್ಧಿಪಡಿಸುವ ಕುರಿತು ಆಲೋಚನೆ ಆತನಿಗೆ ಬಂತು.
ಐಫೋನ್‌ ಡೆವಲಪರ್‌ ಜೊತೆ ಸೇರಿ ಒಂದು ಆ್ಯಪ್‌ ರಚಿಸಿದರು. ಆದರೆ, ಅದು ಹೆಚ್ಚು ಜನರನ್ನು ತಲುಪಲಿಲ್ಲ.. 2009ರಲ್ಲಿ ಆ್ಯಪಲ್‌ ಫುಷ್‌ ನೋಟಿಫಿಕೇಷನ್‌ ಆರಂಭಿಸಿತು. ಆ ನೋಟಿಫಿಕೇಷನ್‌ ಮೂಲಕ ಈ ಆ್ಯಪ್‌ನ ಪ್ರಚಾರ ಮಾಡಿದರು. ಆತನ ಸ್ನೇಹಿತರು ಇದನ್ನು ನೋಡಿ ಜೋಕ್‌ ಮಾಡಿದರು. ಆದರೆ, ಕೆಲವೇ ದಿನಗಳಲ್ಲಿ ಈ ಆ್ಯಪ್‌ ಅನ್ನು 2.5 ಲಕ್ಷ ಜನರು ಡೌನ್‌ಲೋಡ್‌ ಮಾಡಿಕೊಂಡಿದ್ದರು. ಆ ಸಮಯದಲ್ಲಿ ಆ್ಯಕ್ಟನ್‌ ಇನ್ನೂ ನಿರುದ್ಯೋಗಿಯಾಗಿದ್ದ. ಕೋಮ್‌ ಆತನಿಗೆ ಈ ಆ್ಯಪ್‌ ಸಂಸ್ಥೆಗೆ ಸಹ-ಸ್ಥಾಪಕರಾಗುವಂತೆ ಆಫರ್‌ ನೀಡಿದರು. ಆ್ಯಕ್ಟನ್‌ ಮತ್ತು ಯಾಹೂನಲ್ಲಿದ್ದ ಆತನ ಸ್ನೇಹಿತರು 2,50,000 ಡಾಲರ್‌ ಹೂಡಿಕೆ ಮಾಡಿದರು. ಮುಂದೆ ನಡೆದದ್ದು ಇತಿಹಾಸ. ಕೋಮ್‌ ಮತ್ತು ಆ್ಯಕ್ಟನ್‌ ಅನ್ವೇಷಣೆಯ ಪ್ರತಿಫಲವೇ ನಮ್ಮನಿಮ್ಮೆಲ್ಲರ ಕೈಯಲ್ಲಿರುವ ವಾಟ್ಸ್‌ಆ್ಯಪ್‌ ಎಂಬ ಮೆಸೆಂಜರ್‌ ಆ್ಯಪ್‌. 900 ಮಿಲಿಯನ್‌ಗೂ ಅಧಿಕ ಬಳಕೆದಾರರನ್ನು ಹೊಂದಿರುವ ಇದನ್ನು ನಂತರ ಬಹುಕೋಟಿ ಡಾಲರ್‌ಗೆ ಫೇಸ್‌ಬುಕ್‌ ಖರೀದಿಸಿತು.
ನೀತಿ: ನಾವು ಹುಟ್ಟುವಾಗ ಬಡವರಾಗಿರಬಹುದು. ನಾವು ಬಡವರೆಂದು ಹಳಿಯುತ್ತ ಕೂರುವುದು ಬೇಡ. ಕರಿಯರ್‌ ಕ್ಷೇತ್ರದಲ್ಲಿ ಈಗ ಅಗಾಧ ಅವಕಾಶಗಳಿವೆ. ನಿಂತಲ್ಲಿ ನಿಲ್ಲದೆ ಅತ್ಯುತ್ತಮ ಕರಿಯರ್‌ ಗುರಿ ಸಾಧಿಸಲು ಕಠಿಣ ಪರಿಶ್ರಮಪಟ್ಟರೆ ಯಶಸ್ಸು ಪಡೆದೇ ಪಡೆಯಬಹುದು.